19-ANYOS, GITUOK SA KAUBANG PASAHERO SA JEEP, GI-RESCUE; SUSPEK GIBUKBOK SA BYSTANDERS
KALISANG ang gibati sa usa ka 19-anyos nga babaye dihang kalit lamang siyang gituok sa kaubang pasahero sa gisakyang jeepney, mga alas 9:30 sa buntag, Pebrero 10, 2025 sa may Barangay Bago Aplaya, Dakbayan sa Davao.
Ang biktima, giilang si alyas Lyza, 19-anyos ug usa empleyado, paingon na unta sa iyang trabahoan dihang kalit nga giduol sa suspek nga si alyas Renz, 26 anyos ug gituok siya sa wala masayring rason.
Dali nga ngayo og tabang ang maong babaye ngadto sa mga nagsunod sa gisakyang jeep, subay sa mga mikatag nga mga videos sa panghitabo. Ang mga bystanders sa Barangay Ulas ang nangunay og rescue sa babaye ug mao sab ang nagtabang sa pagbukbok sa suspek aron makaikyas ang biktima.
Kasamtang gikustodiya sa kapulisan ang suspetsado. Nasayran sa pagpanubay sa kapulisan nga na-depress ang maong lalaki tungod kay namatay ang iyang asawa, wala siya’y trabaho ug nabiyaan ang ilang duha ka mga anak. Mag-atubang siya’g kasong physical injury.
Giklaro usab sa DCPO nga sukwahi sa unang mikatag nga mga istorya, wala’y hostage-taking nga nahitabo.
DCPO, Screenshot sa video ni Diocelyn Jabillo
