ISANG PASTOR UMANO ANG HUMINGI NG KOTSE BILANG REGALO SA KAARAWAN: VIRAL ANG REKLAMO
Umani ng matinding atensyon sa social media ang post ni Zamora Cha, kung saan ibinahagi niya ang mga nangyayari sa kanilang simbahan. Ayon sa kanya, isang pastor ang humiling ng kotse bilang regalo sa kanyang kaarawan. Ang post ay tila puno ng sama ng loob at may layuning ibulgar ang diumano’y mga hindi
makatarungang gawain ng pastor at ilang nasa mataas na posisyon sa simbahan.
Kwento ni Zamora, tila ginagawa raw basehan ang laki ng donasyon ng mga miyembro upang masukat ang kanilang “faith” at “love” sa Diyos. Dagdag pa niya, ang mga miyembro, karamihan ay mga estudyante pa, ay binibigyan ng obligasyong magbigay buwan-buwan kahit hirap na hirap na sa pang-araw-araw na buhay. Sa kabila nito, wala raw pakialam ang pastor sa kalagayan ng mga miyembro kung may makakain pa ba ang mga ito o may matitirhan pa sila.
Bukod dito, binanggit niya ang mga sakripisyong ginagawa ng mga miyembro, tulad ng pagbabayad ng ₱2,000 kada dalawang buwan para sa isang church event kahit wala silang maayos na suporta o tulong na natatanggap. “Ginagawa namin ito dahil mahal namin ang Diyos,” aniya. Ngunit ayon sa kanya, nadurog ang tiwala nila nang malaman nilang ginagamit lang sila ng ilan sa mga lider para sa pansariling interes.
Naglahad din si Zamora ng mga personal na obserbasyon. Aniya, marami sa mga miyembro ay halos walang makain, walang pambayad sa tirahan, at nagkukulang na rin sa oras para sa pamilya o pag-aaral dahil sa sobrang pagtutok sa church activities. Gayunpaman, ang mga nasa mataas na posisyon naman ay tila nagtatamasa ng mas maayos na kalagayan.
Sa huli, nanawagan si Zamora ng hustisya, hindi lamang para sa mga financially abused kundi pati na rin sa mga umano’y biktima ng sexual abuse na naganap sa loob ng simbahan. “Hindi lang si pastor ang dapat managot, kundi pati na rin ang mga kasabwat niya,” dagdag pa niya.
Ang tanong ng marami: kailan kaya titigil ang ganitong uri ng pang-aabuso sa ngalan ng relihiyon?
