𝗜𝗟𝗢𝗬 𝗡𝗚𝗔 𝗡𝗔𝗠𝗔𝗧𝗬𝗔𝗡 𝗦𝗔𝗡𝗚 𝗞𝗔𝗣𝗜𝗗 𝗡𝗚𝗔 𝗟𝗔𝗣𝗦𝗔𝗚, 𝗪𝗔𝗟𝗔 𝗚𝗜𝗡𝗣𝗔𝗦𝗔𝗬𝗟𝗢 𝗚𝗜𝗟𝗔𝗬𝗢𝗡 𝗦𝗔𝗡𝗚 𝗥𝗠𝗣𝗛 𝗦𝗔 𝗣𝗥𝗜𝗕𝗔𝗗𝗢 𝗡𝗚𝗔 𝗢𝗦𝗣𝗜𝗧𝗔𝗟 𝗕𝗔𝗡𝗚𝗨𝗗 𝗦𝗔 𝗕𝗜𝗟𝗟; 𝗟𝗢𝗟𝗔, 𝗦𝗜𝗡𝗚𝗚𝗜𝗧𝗔𝗡 𝗔𝗡𝗚 𝗛𝗨𝗦𝗧𝗜𝗦𝗬𝗔!
Nagahilibion kag tuman ang kasakit sang buot sang isa ka lola nga tubtob sa karon indi sa gihapon mabaton ang pagkapatay sang iya duha ka kapid nga apo bangud sa ginapatihan kapabayaan sang na-asayn nga doktor kag nurses sang Roxas Memorial Provincial Hospital.
Sa interview sang XFM Roxas kay nanay Jocelyn Vega, lola sang duha ka nagtaliwan nga lapsag, emosyonal sini nga ginpahayag nga dako gid ang kapabayaan kag pagpasalig sa ila sang mga doktor nga amo ang balasulon.
Pagsaysay ni nanay Jocelyn nga alas-2:00 sang magaaga sang Marso 17, naglupok na ang panubigon sang iya bata gani gilayon sila nga nagpadulong sa RMPH partikular kay Dr. Potasio nga gin-refer lang sa ila sang ila OB.
Una palang nga pag-abot sa RMPH suno kay nanay nga ginhinyo niya na sa doktor nga i-cesarean ang iya bata bangud kapid kag kulang sa binulan ang ginadala sini kag Abril 12 pa ang due. Apang ginsabat siya sini nga indi pwede kag i-normal delivery lang ini kun sarang malang sang iloy.
Ginpinahigda lang suno diri ang iya bata sa delivery room tubtob las-9:00 sang aga nasugata sang lola si Dr. Potasio kag ginkamusta niya ang kahimtangan sang iya bata kag apo kag ginsabat siya sini nga wala problema kag okay ang tanan, okay ang laboratory kag heart beat sang bata. Nagpasalig pa ini nga secure sila sa RMPH.
Apang, kaangay wala ginhatagan sang nagakaigo nga atensyon ang nagabusong nga babayi tubtob las-3:00 sang hapon, nga nagkabalaka na si nanay Jocelyn nga hala liso-liso sang doktor kag nurses sa iya bata bangud indi na makita ang heartbeat sang isa ka bata. Hasta naabutan alas-5:00 sang hapon hinali nalang siya suno diri ginhambalan nga magpangita sang iban nga ospital nga may incubator bangud premature ang mga lapsag.
Diri na lamang ang kaakig sang lola kun ngaman ulihi na ini ginhambal nga kaina pa sang aga nga check-up kag nahibaluan na sang doktor nga premature ang mga bata. Ginapakadto pa sila suno diri sa isa ka opsital sa Iloilo kun sa diin may mga eksperto nga doktor sa premature.
Kasunod sini, naglasa-lasa na si nanay Jocelyn kag nagnilukso sa nagkalain-lain nga pribado nga ospital sa syudad tubtob nalab-ot sa Capiz Doctors Hospital nga amo ang may available nga incubator. Apisar ginsukot sang downpayment, wala na nagduha-duha ang lola basta gid lamang matatap na ang iya bata.
Nagdugang pa ang kaingit ni nanay Jocelyn sang nagbalik siya sa RMPH, bangud ginbalabagan nga makaguha ang iya bata bangud kinahanglan pa suno diri nga bayaran ang ila bill. Tuman ang hinyo ni nanay Jocelyn nga paunahon na saylo ang iya bata kag siya na lamang ang mapabilin kag maasikaso sang bill, apang gintudlo pa siya suno diri sang cashier kay Dr. Florencio Luching, Chief of Hospital sang RMPH nga amo ang magadesisyon.
Pag-abot sa hulot ni Dr. Luching, didto na naghininyo ang lola nga paunahon guwa ang iya bata, apang ginsabat siya sini nga sarang gani nila magbayad sang P40,000 nga down payment sa pribado nga ospital tapos indi nila mabayaran ang ila bill.
Liwat naman nga nagbalik ang lola sa cashier kag nagtuad naman ini nga mag-ayo kay Dr. Luching, apang 300 pesos gid lamang ang ginbuhin sang doktor sa ila bill. Ginsabat ini ni nanay Jocelyn nga indi na niya kinahanglan ang amo nga kantidad matapos sang ila antos kag malawig nga hulat.
Nakaguwa na lamang ang mag-iloy sa RMPH pasado alas-7:00 na sang gab-i.
Sa pihak sang kasakuon kag naagyan sa bilog nga adlaw, kasubong nalimtan na ini ni nanay Jocelyn kag nabayluhan sang excitement nga nakaplastar na ang iya bata sa Doctors Hospital kag makita niya na ang iya duha ka apo.
Apang, kasubong hinulugan ini sang langit sang mahibaluan nga tiskog kag wala na sang kabuhi ang kapid nga lapsag.
Ginkatingala pa suno diri sang doktor sang nasambit nga pribado nga ospital nga wala nga daan gin-cesarean ang first time mom nga bata ni nanay Jocelyn sa pihak nga madugay na nga tion nga naglupok ang panubigon kag premature pa.
Tul-id ang pagpati sang lola nga ang kapabayaan kag pagpasalig ni Dr. Potasio kag Dr. Luching sang RMPH ang gintunaan sang kamatayon sang iya mga pinalangga nga apo.
Hugot sa karon ang panawagan ni nanay Jocelyn kay Governor Fredenil H. Castro kag Ivisan Mayor Ipe Yap nga buligan sila nga maangkon ang hustisya.
𝗜𝗟𝗢𝗬 𝗡𝗚𝗔 𝗡𝗔𝗠𝗔𝗧𝗬𝗔𝗡 𝗦𝗔𝗡𝗚 𝗞𝗔𝗣𝗜𝗗 𝗡𝗚𝗔 𝗟𝗔𝗣𝗦𝗔𝗚, 𝗪𝗔𝗟𝗔 𝗚𝗜𝗡𝗣𝗔𝗦𝗔𝗬𝗟𝗢 𝗚𝗜𝗟𝗔𝗬𝗢𝗡 𝗦𝗔𝗡𝗚 𝗥𝗠𝗣𝗛 𝗦𝗔 𝗣𝗥𝗜𝗕𝗔𝗗𝗢 𝗡𝗚𝗔 𝗢𝗦𝗣𝗜𝗧𝗔𝗟 𝗕𝗔𝗡𝗚𝗨𝗗 𝗦𝗔 𝗕𝗜𝗟𝗟; 𝗟𝗢𝗟𝗔, 𝗦𝗜𝗡𝗚𝗚𝗜𝗧𝗔𝗡 𝗔𝗡𝗚 𝗛𝗨𝗦𝗧𝗜𝗦𝗬𝗔!
